Публикации » Мĕн пуррипе çырлахмах тивет

25 августа 2010 г.

Кăçал çĕр ĕçченĕ акнă-лартнă культурăран кĕтнĕ тухăç илеймерĕ. Çавăнпа та мĕн пуррипе перекетлĕ усă курса çырлахмах тивĕ. Иртнĕ канмалли кунсенче Туçа тăрăхĕнче уйрăм хушма хуçалăхсенче çĕр улми кăларма пикенчĕç. Тухăç савăнмалăх, мăнаçланмалăх çук. Çĕр çимĕçĕ нихçанхинчен те вĕтĕ, йышĕ те ытти çулсенчи пек мар. Чылайăшĕ çурт хыçĕнчи пахчасенчен 15-20 михĕ çĕр улми çеç кăларса илет. Унтан вара çитес çул валли вăрлăх та хăвармалла, çемьен те тăранса пурăнмалла. Перекетлес тĕлĕшпе ирĕксĕрех хăнăхнă пахча çимĕçе кĕрпе-салмапа черетлеме тивĕ.