15 сентября 2010 г.
Шăнкăртамри культура çуртĕнче тутар эстрада юррисемпе ташшисен “Рамазан-2010” фестивалĕ иртнĕ. Йăлана кĕнĕ фестивале кăçал 19-мĕш хут йĕркеленĕ.
Аякран та çывăхран çитнĕ юрă-ташă ăстисене, хăнасене, курма килнисене Чăваш Республикинчи Мăсăльмансен тĕн управленийĕн председателĕ Альбир хазрат Крганов муфти, район пуçлăхĕ Н. Глухов, “Гулистан” медресе ректорĕ Наиль хазрат Ямалутдинов, Шăнкăртам ял поселени пуçлăхĕ Р. Купкенов, тутарсен Наци культурин автономийĕн районти центрĕн председателĕ М. Якушева саламланă, халăх культурине аталанма пулăшакансене ăнăçу суннă.
“Рамазан-2010” фестиваль итогĕпе Хусанти культура институчĕн студентки Г. Хасанова Гран-При çĕнсе илнĕ. Сцена ăстисенчен пĕрремĕш вырăна А. Камалетдинова, иккĕмĕшне А. Хисаметдинова, виççĕмĕшне А.Давлетшина йышăннă. Аслисенчен Г. Мулюкова, ачасенчен И. Габитова, ачасен эстрада юррисенчен И. Челяков, ташăсенчен Шăнкăртамри пĕрремĕш вăтам шкулти “Биляр” ушкăн, сăвăçсенчен И. Пазюкова чи-чи пултаруллă пулнине палăртнă.
(Хамăр корр.).