13 октября 2010 г.
Ыран, юпа уйăхĕн 14-мĕшĕнче ирхине сакăр сехетре Пĕтĕм Раççейри халăх çыравĕ пуçланать. Сирĕн алăкран ятарлă тум тăхăннă (уйăрмалли паллăсем: кăвак шарф, çавăн тĕслĕ сумка, шăхличĕ, фонарь, кăкăрĕ çинче çыравçă пулнине ĕнентерекен удостоверени) çын килсе шаккасан, пĕр иккĕленмесĕрех унпа уççăн калаçма, вăл ыйтнине туллин хуравлама пултаратăр. Ку вăл – çыравçă.
Районта Пĕтĕм Раççейри халăх çыравĕ ăнăçлă иртсе кайтăр тесе мĕн пур ыйтусене хатĕрлесе çитернĕ. Çырав участокĕсен заведующийĕсем, инструкторсем, çыравçăсем пурте ятарлă вĕрентÿ курсĕнче пулса тестпа хăйсен пĕлĕвне хакланă. Ку тĕлĕшпе кашниех занятисене пысăк яваплăхпа çÿренĕ.
– Патăрьелсем Пĕтĕм Раççейри халăх çыравне ăнăçлă ирттерсе яма хатĕр. Çырав вăхăтĕнче çынсен пысăк ăнланулăхпа, яваплăха туйса хурав памалли çеç юлать. Çыравçă никамран та, нимĕнле документ та ыйтмĕ. Анчах та шанса калаçнă хурав хамăрăн паянхи пурнăçа тĕрĕс хак пама, малашнехи пурнăçа патшалăх шайĕнче лайăхлатма пулăшмалли никĕс пулĕ. Çавăнпа та Юхмапа Пăла тăрăхĕнче халăх çыравĕн итогĕсем ăнăçлă пуласса шанатăп, – пĕлтерчĕ районти çырав уполномоченнăйĕ Г. Афа-насьев.
А. ЕГОРОВА.