20 октября 2010 г.
Ишлĕри Прокопьевсен çурчĕ вăрман хĕрринчех, 5-6 метртанах хыр вăрманĕ кашласа ларать. Тен, çавăнпах пуль Петр Васильевичăн виçĕ ывăлĕ те хăйсен пурнăçне вăрман хуçалăхĕпе çыхăнтарнă. Асли, Василий, Сĕнтĕрвăрринчи вăрман хуçалăх техникумне вĕренсе пĕтернĕренпех Пăрачкав тăрăхĕнчи Старокаменное лесничествăна ертсе пырать. Куçăмсăр майпа Йошкар-Олари вăрман хуçалăх институтĕнчен вĕренсе тухнă. Ĕçре палăрнăшăн Василий Прокопьева 2007 çулта “Чăваш Республикин тава тивĕçлĕ лесовочĕ” хисеплĕ ят панă.
Вăталăххине, Александр Петровича, Сĕнтĕрвăрринчи техникум хыççăн аякри Пермь облаçне янă. Свердловскри (халĕ Екатеринбург) вăрман хуçалăх институтне вĕренсе пĕтерсен вăрман хуçалăхĕн тĕп лесничине лартаççĕ. 1989 çулхи çуркунне субботник вăхăтĕнче çын пурнăçне çăлса хăварать, анчах хăй вилет.
Николай та тетĕшсен çу-лĕпех кайнă, вĕсем вĕреннĕ техникумрах ăс пухнă. Пĕр хушă Старокаменное лесничествăра тăрăшать. Пултаруллă специалиста Сĕн-тĕрвăрринчи вăрман хуçалăх техникумне ĕçлеме чĕнсе илеççĕ. Пĕлĕвне ÿстерес тĕллевпе çемьеллĕ, икĕ ачаллă преподаватель куçăмлă майпа Екатеринбургри академинче вĕренет. Халĕ вăл “Вăрман хуçалăхĕ” предмета вĕрентет.
В. ЗАЙЦЕВ, Ишлĕ.