27 октября 2010 г.
Чăваш Республикин Министрсен Кабинечĕн постановленийĕпе килĕшÿллĕн кăçал виççĕмĕш çул Чăваш Енре “Çулталăк çемйи” конкурс иртет. Маларах вара ăна районсенче йĕркелеççĕ. Йăлана кĕрсе пыракан мероприяти кăçал та Юхмапа Пăла тăрăхĕнче кăсăклă иртнĕ. Анчах çакна та палăртса хăвармалла. Конкурса кăтартуллă çемьесем кашни ял поселенинченех хутшăнман. Хальхинче Патăрьел, Аслă Чемен, Первомайски, Кзыл Чишма, Турхан, Шăнкăртам ял поселенийĕнчи çемьесем çеç хăйсен пултарулăхне кăтартнă.
Аслă Чемен ял поселенинчен çемьесен конкурсне Кошелевсем хутшăннă. Çак çемье ырă кăмăллăхпа, ĕçченлĕхпе, тараватлăхпа уйрăлса тăрать. Ашшĕ-амăшĕ ачисемшĕн яланах ырă тĕслĕх вырăнĕнче. Евгения хĕрĕпе Алексей ывăлĕ шкулта иртекен конкурссене, спорт мероприятийĕсене тăтăшах хастар хутшăнаççĕ. Кошелевсен çемйи конкурсра “Социаллă хастар çемье” номинацире палăрнă.
Районти конкурса Анат Чакăра пурăнакан Шашкинсен çемйи те хутшăннă. Çемье пуçлăхĕ–Леонид Иванович мĕн ачаран футболла, хоккейла выляма юратать. Вăлах чылай спорт мероприятийĕсен пуçаруçи. Романпа Павел ывăлĕсем те спортпа туслă. Конкурсра Шашкинсене “Спорт çемйи” тесе хак панă. Патăрьелĕнчи Раковсен çем-йине вара комисси членĕсем уйрăмах ĕçченлĕхпе палăртса хăварнă. Çемье пуçлăхĕ Владислав Александрович техникăпа питĕ туслă. Вăл ăста строитель, пултаруллă платник. Мăшăрĕ, Наталья Алексеевна, хĕрĕсене хăй пекех алă ĕçне хăнăхтарать.
Красномайскинчи Василий Георгиевичпа Эльвира Ивановна Емельяновсем иккĕшĕ те педагог. Вĕсем тăтăшах шкулта, ялта, районта иртекен тĕрлĕрен мероприятие хутшăнаççĕ. Хĕрĕсем вара нумай олимпиадăпа конкурссен призерĕсем. Вĕсене жюри членĕсем “Творчество çемйи” тесе хакланă.
Турханти Родионовсен çемйи юрă-кĕвĕпе питĕ туслă. Ружена Владимировнăпа Николай Васильевич юрра-ташша ăста çынсем. Родион ывăлĕпе Карина хĕрĕ те тĕрлĕ конкурс-фес-тивальте пĕрре мар çĕнтерÿçĕ ята тивĕçнĕ. Çакна шута илсе Родионовсене “Юрă-кĕвĕллĕ çемье” номинацире палăртнă.
“Çулталăк çемйи” конкурсăн тĕп титулне Шăнкăртамри Абейдулловсем çĕнсе илнĕ. Телгать Киаметдиновичпа Гелсирень Гадельзяновна икĕ хĕрпе пĕр ывăл çитĕн-тереççĕ. Çемьере вĕсен яланах килĕшÿ, ăнлану, лăпкăлăх хуçаланать. Çемье пуçлăхĕ Афганистанра çар хĕсметĕнче пулнă, спортпа питĕ туслă. Г.Абейдуллова Шăнкăртамри пĕрремĕш вăтам шкул директорĕ. Хăйĕн ĕçне тÿрĕ чунпа пурнăçласа пынăшăн вăл Раççей Федерацийĕн Президенчĕн премине, Чăваш Республикин Президенчĕн Тав çырăвне тивĕçнĕ тата ытти те.
Районти конкурсра çĕнтернĕ Абейдулловсен çемйине республикăри тупăшура хутшăнма ăнăçу сунатпăр.
А.НИКОЛАЕВА.