20 ноября 2010 г.
2010 çул выльăх-чĕрлĕх пăхакансен умне пысăк йывăрлăх кăларса тăратрĕ: апат пĕлтĕрхине çитеймест. Тăрăшуллă хуçалăхсем ăна республика тулашĕнчен кÿрсе килнĕрен хĕл кунĕнче аптрамĕç-ха (хăшĕсем халĕ те турттараççĕ), юлса пыракансене çăмăлах килмĕ.
Çавăн пекех ял хуçалăх организацийĕсенче сăвакан выльăх йышĕ чакать. Çакă Пăрачкав, Çĕрпÿ, Етĕрне тăрăхĕсенче палăрмаллах сисĕнет–127-213 пуç таранах. Çав хушăрах Шупашкар, Патăрьел, Комсомольски, Тăвай, Муркаш–пурĕ 12 районта–ĕне йышне сыхласа хăварнă çеç мар, кăштах хушăнтарнă та.
Выльăх апачĕ хĕсĕкрен ĕнесене ял çыннисем те сутаççĕ. Чăваш Енре кĕтÿ пĕлтĕрхи çак тапхăртинчен 2707 пуç сахалланнă.
А.ИВАНОВ.