22 января 2011 г.
Чăваш Республикин Президенчĕ Михаил Игнатьев ертсе пыракан делегаци официаллă визитпа Ульяновск облаçĕнче пулнă.
Кăшарни кунĕнче республика пуçлăхĕ Иван Яковлевăн музей комплексĕ çумĕнчи чиркÿре пулнă, Чĕмпĕр чăваш шкулĕпе паллашнă, унта Ульяновск облаçĕнчи наци-культура автономийĕн президиумĕпе ăшă та кăмăллă тĕл пулу иртнĕ.
Кунтах Ульяновск облаçĕнче Пĕтĕм чăвашсен “Акатуй” уявне ирттерессипе, наци ялне тăвассипе çыхăннă темăсене сÿтсе явнă. Палăртни вырăнлă: облаçра 111 пин чăваш пурăнать. Икĕ регион ĕçтешлĕхĕ çуллен çирĕпленсе пырать.
Çавăн пекех Чăваш Ен делегацийĕ Ульяновск хулинче облаçа туса хунăранпа 68 çул çитнин уявне халалланă савăнăçлă пухăва та хутшăннă.
Юлашкинчен Ульяновск облаçĕн правительствипе Чăваш Республикин Министрсен Кабинечĕ Чăваш Республикин Культура кунĕсене тата Пĕтĕм чăвашсен Ульяновск облаçĕнчи “Акатуй” наци уявне йĕркелесе ирттерес енĕпе тачă çыхăну тытса ĕçлесси çинчен калакан килĕшĕве алă пуснă.