26 марта 2011 г.
Турханти психоневрологи интерначĕн коллективĕ республикăра сывă пурнăçа пропагандăлас тĕлĕшпе йĕркелекен мероприятисене кашнинех хастар хутшăнать. Çак кунсенче вĕсем Шупашкар районĕнчи инвалидсемпе ватăсен “Вега” сиплев центрĕнче ЧР Сывлăх сыхлавĕпе социаллă аталану министерстви йĕркеленĕ хĕллехи спорт фестивалĕнче хăйсен пултарулăхне кăтартнă. Фестивале 12 команда хутшăннă, тĕрлĕ енлĕ тупăшура вăй виçнĕ.
Ăмăртура республикăри учреждени ертÿçисем хушшинче VIP-чупу уйрăмах кăсăклă иртнĕ. Турханти психоневрологи интерначĕн коллективĕн команди йĕлтĕрпе чупса финиша виççĕмĕш çитнĕ.
Коллектив ыркăмăллăх акцийĕсенче те кăтартуллисен шутĕнче. Тăлăх, йывăр шăпаллă ачасене, инвалидсене медицина пулăшăвĕ пама республикăри Ача-пăча фончĕ йĕркеленĕ “Ырă тума васкăр” акцие хутшăнса счет çине ултă пин тенкĕ укçа куçарса панă.