05 мая 2011 г.
Ака уйăхĕн вĕçĕнче районта çине-çинех пушар тухса инкек кăтартнă. Тăрăнти С.Думилина хуçалăхĕнче электричество кĕске замыканине пула тухнă инкекре мунчипе хуралтисем сиенленнĕ. Вăтаелĕнчи К.Кадкинасен хуçалăхĕнче те çак сăлтавпах хĕвел анас умĕн вут-çулăм алхасма пикеннĕ. Юрать-ха ăна питех сарăлма паман.
Иртнĕ эрнекун каçхине 22 сехетсенче вара Первомайскинчи С.Лукинсен тĕреклĕ те капăр çурт-йĕрĕ йăлтах çунса кайса çемьене пысăк тăкак кÿнĕ. Сасартăк хыпса илнĕ çулăма парăнтарма 5-6 пушар машини шывпа сирпĕтнĕ, тракторсемпе те шыв турттарсах тăнă, анчах та хăватлă вут вăйне çĕнтереймен. Хальхи вăхăтра районти пушар хуралĕн ĕçченĕсем пушарăн сăлтавне тĕпчеççĕ.