28 мая 2011 г.
Çуркунне. Тавралăх чĕрĕлет. Кунсерен йывăç-курăк ытларах та ытларах симĕсленет. Пурте йĕри-таврари илемпе киленсе утаççĕ. Чун-чĕре юрлать, ăшра ырă туйăмсем çуралаççĕ. Çакăн пек çĕкленÿллĕ ту-йăмпа ял еннелле, Вăтаелне, утатăп. Анчах та аслă çулăн икĕ айккипе çÿп-çап, кĕленче, пластмасса савăтсем выртаççĕ. Кам пăрахнă вĕсене; Хамăрах! Никамăн та пуçтарас, пĕшкĕнес килмест. Картишĕнчен, умран тасатса çул айккине кайса пăрахни тирпейлине мар, çынлăх çуккине кăтартса парать.
Вăтаелĕнче тăваттăмĕш çул ĕнтĕ Валентина Яковлева ертсе пынипе “Эпир – тирпейлĕхшĕн” ушкăн ĕçлет. Çуркунне ачасем çÿп-çапа пуçтарса транспорт çине тиеççĕ, уйăрса панă вырăна кайса тăкаççĕ. Кăçал та пурте пĕр çын пек пулса уроксем хыççăн, вĕренекенсем пулăшнипе, çул айккине тап-таса турăмăр. Ача садне çÿрекен А.Виноградовăпа Р.Викторов та пысăккисенчен юлмарĕç. Д.Кудрявцевпа С.Щербаков пухăннă ăпăр-тапăра транспортпа турттарса тăчĕç.
Н.ЯКОВЛЕВА,
Вăтаел ял библиотекин ертÿçи.