01 июня 2011 г.
Çĕнтерÿ кунĕнче çак ятпа Козловка-Пăлакасси клубĕнче мероприяти иртрĕ. Унта ашшĕсем Тăван çĕр-шывăн Аслă вăрçине тухса кайнă чухне ачалла тăрса юлнисем хутшăнчĕç: В. Плешков, Л. Бурмисова, А. Урукова, Е. Федорова, М. Волкова тата çак йĕркесен авторĕ В. Хитрова. Хамăр ачалăха, нушаллă пурнăçа куççуль витĕр аса илтĕмĕр.
Эпир аттерен 5 ача тăрса юлнă. Анне пире пăхса ÿстерме мĕнле вăй-хăват çитернĕ-ши; Ун чухнехи йывăр вăхăтсене пула кирлĕ пек пĕлÿ илеймерĕмĕр. Укçасăр, çи-пуçсăр ăçта тухса кайăн; Çавăн пек синкерлĕ самана тек ан пултăрччĕ, мирлĕ пурнăçпа çеç пурăнасчĕ.
Тĕл пулăва пĕр сăвăран илнĕ йĕркесемпе вĕçле-рĕмĕр:
“Паян аттен çуралнă кунĕ,
Тултармаллаччĕ
шăп 100 çул.
Атте çуртийĕ ĕмĕр сÿнмĕ,
Кĕтетпĕр, кĕтрĕмĕр кун чул”.
В. ХИТРОВА. Козловка.