23 июня 2011 г.
Алманчă ялĕ çывăхĕнчи вăрманта экологсен, çамрăк вăрманçăсен, таврапĕлÿçĕсен тата туристсен “Методикăпа вĕрентÿ кунĕ” иртнĕ. Первомайскинчи, Алманчăри, Çĕньялти вăтам шкулсенче вĕренекенсем Алманчăри пĕлÿ çуртĕнче историпе вĕрентекен В.Волков ертсе пынипе ÿсен-тăран, хурт-кăпшанкă пурнăçĕсене тĕпченĕ, ял тата тавралăх историйĕпе паллашнă. Гербари валли çулçăсем, чечексем пухнă, кăмпа татнă. Вячеслав Вениаминович ачасене туризмри тĕп чăрмавсене, вĕсене мĕнле çĕнтермеллисене вĕрентнĕ. Кайран хăйсен пĕлĕвне тĕрĕслесе вĕренекенсем ăмăрту ирттернĕ. Алманчăсем – пĕрремĕш, Первомайскисем – иккĕмĕш, Çĕньялсем виççĕмĕш вырăнсене йышăннă. Юлашкинчен пурте пĕрле кăвайт çинче кăмпа яшки пĕçерсе çинĕ.