09 июля 2011 г.
Раççей Федерацийĕн Конституцийĕпе килĕшÿллĕн 18 çул тултарнă кашни каччă, сывлăх тĕлĕшĕнчен хирĕçлеме сăлтав çук пулсан, тăван çĕр-шыва хÿтĕлеме каймалла. Пĕтĕмĕшле илсен çак ĕç районта начар мар пулса пырать.
Çуркуннехи призывра Çĕнĕ Ахпÿрт ял поселенине кĕрекен Кивĕ Катек ялĕнчи çамрăксене пĕрин хыççăн теприне çар хĕсметне ăсатнă. Çак кунсенче çеç ашшĕ-амăшĕ, тăван-пĕтенĕ, ял-йыш тăватă çамрăка салтак ятне чыслă тытма ырă сунса пилленĕ. В.Каррин, П.Кошкин, С.Маслов каччăсене çулталăка ирттерме йывăрах пулмĕ. Д.Федорова вара çак шутлă кунсем сисĕмлĕ те туйăнĕç, мĕншĕн тесен ялта ăна юратнă мăшăрĕпе ывăлĕ чăтăмсăррăн кĕтĕç.