10 сентября 2011 г.
Районти пушар хуралĕнчен пĕлтернĕ тăрăх çулталăк пуçланнăранпа Юхмапа Пăла тăрăхĕнче вут-кăварпа çыхăннă 28 инкеке шута илнĕ. Çурлан юлашки кунĕнче вăл Çĕньялти Ф.Михеева хуçалăхĕнче сиксе тухнă. Кил хуçисем лаçра выльăх апачĕ пĕçернĕ. Вут-кăвартан асăрханассине вара тĕпе хуман курăнать.
Икĕ кун маларах пушар Шăнкăртамсене ура çине тăратнă. Хĕвел аннă хыççăн Р.Узбековсен çурт тăрринчи мачча çийĕнчен тĕтĕм йăсăрланма пуçланă, кивелнĕ электропăралуксенчен вут хыпса илнĕ. Юрать-ха, инкеке вăхăтра асăрханă, ăна аталанма паман.