10 сентября 2011 г.
Хальхи вăхăтра ял халăхĕ хăтлăх тĕлĕшпе хуларисенчен пĕрре те кая пурăнмасть. Çуртсем килĕренех “кăвак çулăмпа” хутăнса ăшăнаççĕ. Чылайăшĕ шыв ăсма та тухмасть, пÿртри крана çеç уçать. Кирлĕ пулсан сивви те, ăшши те унтанах юхать. Ырлăхăн пĕр пайĕ яла та çитнишĕн хĕпĕртемелле çеç. Алманчăра пурăнакансен ытларах пайĕ те çакнашкал хăтлăхпа савăнса усă курать. Çакăншăн паян чун хĕпĕртет, анчах хăш-пĕр хуçалăхсем умĕнче тирпей-илем, хуçа алли çитейменни пăшăрхантарать. Калаçăва акă мĕн пирки пуçарасшăн.
Алманчăра та районти ытти ялсенчи пекех килти хушма хуçалăхра йышлă выльăх-чĕрлĕх, кайăк-кĕшĕк усраççĕ. Пĕрисем вĕсене кил картинчен те кăлармаççĕ, теприсем вара пысăк хушма хуçалăхра вырăн тупаймасăр çул хĕрринех, автомашинăсем иртсе çÿрекен çул çумнех хур-кăвакал усрама пысăк картасем тытса хураççĕ. Ял поселенийĕн çĕрĕ çинче çапла хуçаланма, çак вырăна выльăх каяшĕсемпе варалама вĕсене кам ирĕк панă-ши; Пурте çапла хăйсем тĕллĕн урам варрине е çул хĕррине хуралтăсем туса пĕтерсен ял илемĕ юлĕ-ши;
В.ВОЛКОВ.
Алманчă ялĕ.