14 сентября 2011 г.
Пирĕн юратнă ентеш-поэтăмăр Василий Давыдов-Анатри пиртен уйрăлса кайнăранпа çулталăк çитрĕ. Вăхăчĕ çĕмрен пек хăвăрт шăвать пулин те поэт-юрăçă пирĕн асрах. Çак кунсенче Первомайскинчи ял библиотекинче ентеш-поэтăмăра асра тытса, хисеп туса литература каçĕ йĕркеленĕ.
Вулакансем поэтăмăр тĕрлĕ çулта çырнă кĕнекисемпе паллашнă, Первомайскинчи вăтам шкулта вĕренекенсем унăн сăввисене вуланă. Василий Давыдов-Анатри сăввипе кĕвĕленĕ “Пире тăван кĕтсе тăрать”, “Тăванлăх юрри”, “Шурă-шурă Шупашкарăм” юрăсене вара литература каçне хутшăнакансем те, ялти вулакансем те кăмăллăн шăрантарнă.
“Йывăр тăпру çăмăл пултăр. Эпир санăн ятна яланах асра тытатпăр, пархатарлă ĕçÿсемпе савăнатпăр”, – тенĕ вулакансем поэтăмăра хисеп туса.