22 октября 2011 г.
Пĕринче Аслă Чементи Р. Алеметкина ытти чухнехи пекех лаçăра выльăх апачĕ пĕçернĕ. Анчах кинемей темĕн асăрханса çитереймен. Вăрăм алăллă вут кармаша-кармаша малтан хуралтăсене, кайран вара пÿртне те хăйĕн ытамне илнĕ. Йывăç çурт-йĕр туххăмрах кĕл купине çаврăннă. Юрать-ха, тăнне çухатнă ватă çынна тĕтĕм-сĕрĕм ăшĕнчен вăхăтра кăларма ĕлкĕрнĕ.
Тепĕр кунхине çурçĕр иртсен вара «хĕрлĕ автан» кÿршĕ ялсене, Шăхачсене, ура çине тăратнă. Каçхи шăплăхра сасартăк Н. Селиверстровсен хуралтисем çунма пуçланă. Телее, ăна кÿршĕсем маларах сиснĕ, пушара аталанма паман.