Публикации » Тенкĕ пус вĕççĕн пухăнать, панă укçана илесех пулать

10 декабря 2011 г.

ĔЛĔКРЕХ чылай çын Росгосстрах урлă хăйне тата ачи-пăчин пурнăçне страхлама тăрăшнă. Инкек тени ура айĕнченех сиксе тухма пултарать-çке. Анчах 90-мĕш çулсенче экономика реформисем пуçлансан çав документсем ахаль хута кăна çаврăнчĕç, çапах пĕтĕмпех пăшăрханса ÿкмелле мар иккен. Правительство Постановленийĕпе килĕшÿллĕн 2010 çулхи раштавран пуçласа патшалăх маларах договор тунă çынсене компенсаци парать: 1992 çулхи кăрлачăн 1-мĕшĕччен страхланă килĕшÿсемпе тÿлев тухать. Вăл кашнийĕн тĕрлĕрен. Енчен те страхланакан 2001-2011 çулсенче вилнĕ пулсан, еткере илсе юлнă çынна хуйхăпа çыхăннă тăкаксене саплаштарма ултă пин таран параççĕ. Тенкĕ пус вĕççĕн пухăнать. Саплаштару укçине тавăрас текенсен Çĕнĕ çулччен кирлĕ хутсене Патăрьелĕнчи Росгосстраха илсе пымалла.