28 января 2012 г.
Раççей Федерацийĕн 1991 çулхи апрелĕн 19-мĕшĕнче йышăннă “Раççей Федерацийĕнче халăха ĕçпе тивĕçтересси çинчен” саккунăн 25 статйипе килĕшÿллĕн организацие хупма е уйрăм предприниматель пек ĕçлеме пăрахма, сотрудниксен штатне чакарма е ĕç килĕшĕвĕсене пăрахăçлама шут тытсан, ĕçпе тивĕçтерекен организацин 2 уйăх маларах, уйрăм предпринимателĕн 2 эрне маларах çакăн çинчен районти халăха ĕçпе тивĕçтерекен службăна çырса пĕлтермелле. Унта ĕçлекенсен профессине, должноçне, квалификацине, специальноçне, ĕç укçи тÿлемелли условийĕсене кăтартмалла. Организацин штатне чакарни ĕçрен массăллă кăларса яни патне çитерет пулсан, виçĕ уйăх маларах çакăн çинчен пĕлтермелле.
Тулли мар ĕç кунĕ е ĕç эрни кĕртес, производствăна чарса лартас пулсан, ĕçпе тивĕçтерекенĕн çакăн евĕр йышăну тунă хыççăн 3 кун хушшинче пирĕн центра çырса килсе памалла.
Ĕçпе тивĕçтерекенсен кашни уйăхра çак хутсене тăратмалла: вакантлă ĕç вырăнĕсем пурри çинчен, инвалидсене йышăнмалли квотăна пăхăнни пирки калакан информаци. Патшалăх органĕсене вăхăтра информаци паманнисене Раççей Федерацийĕн Административлă кодексĕн 19.7 статйипе килĕшÿллĕн административлă явап тыттарĕç (асăрхаттару е штраф; граждансене 100-300 тенкĕ, должноçри çынсене 300-500 тенкĕ, юридици сăпачĕсене – 3000-5000 тенкĕ).
Г. АФАНАСЬЕВ,
районти ĕçпе тивĕçтерекен центр директорĕ.