Публикации » Сăваплă вырăна таса тытар

28 апреля 2012 г.

МАСАР – таса та сăваплă вырăн. Унта вилнисен ÿчĕсем Иисус Христос иккĕмĕш хут килсе вĕсене чĕртсе тăратиччен упранаççĕ. Çакна асра тытса масар çинче хамăра питĕ йĕркеллĕ тытмалла, вил тăприсене вăхăтра тирпейлемелле, юхăнса кайма памалла мар. Çветтуй Тройцă праçникĕ çитиччен ĕмĕрлĕх тĕнчене куçнисем канлĕх тупнă вырăна йĕркене кĕртмелле. Православи тĕн йăли-йĕркине тытса пыракансене çакна та асăрхаттарса хăварас килет: чиркÿ настоятелĕсем вилнисене асăннă кунхине масар çинче ĕçсе çини вырăнсăр теççĕ. Çак йăла-йĕркене килте сĕтел хушшинче туса ирттерсен аван. Курăк çине апат-çимĕç хурса хăварни те начар йăла-мĕн. Апла туса эпир вилнисене усă кÿместпĕр, хамăр çеç çылăха кĕретпĕр иккен. Вĕсемшĕн пĕтĕм чĕререн кĕл туни, ячĕпе хамăртан чухăнрах çынсене пулăшни питĕ лайăх.