05 мая 2012 г.
Пĕтĕм тĕнчери сывлăх организацийĕн кăтартăвĕпе паянхи куна планета çинчи 450 миллион çын психика чирĕпе чирлет. Хĕвел тухăç çĕр-шывĕсенче кашни çиччĕмĕшĕ депрессиллĕ тата алкоголизмпа çывăх. Специалистсем каланă тăрăх 2020 çул тĕлне çаксем тĕнчипе малта тăракан 5 чир шутне кĕрĕç.
Психика енчен сывлăхлă пулас тесен мĕн тумалла-ха; Никам та пĕлмест. Стреслă лару-тăру пулни, тĕрĕс мар апатланни, кирлĕ-кирлĕ мар информацие ăша илни те çак çул çине тăратаççĕ пулас.
Пурнăçра пăшăрханмалли пулатех: политика, экономика улшăнăвĕсем, ĕçри йĕркесĕрлĕх, обществăлла транспортпа çÿресси. Анчах çыннăн хăйне-хăй лăплантарма тăрăшмалла. Ку енĕпе йывăрлăх туятăр пулсан, психиатр патне каймалла. Хамăра хамăр хисепе хуни вырăнлă.
Чăн, суя е ÿстерсе каланă информаци те çынна сахал мар иккĕлентерет. Япони специалисчĕсем ăна информаци стресĕ теççĕ. Эпир унпа халерех çеç тĕл пулатпăр-ха. Хăшпĕр хаçат-журналта реклама шайĕшĕн пичетленекен статьясем сахал мар. Чылай вулакан вара вĕсен начар енне мала хурать. Мĕн каласшăн-ха юлашкинчен; Сывă пур-нăç йĕркине пăхăнни иккĕленчĕке сирсе яма пулăшатех. Вăй-халтан хастар пулар, çут çанталăкпа çывăхланар, хамăрăн туйăмсене йĕркене кĕртер, çавăн чухне пире чир-чĕрĕ те çу-лăхмĕ.
Л.ТИНЮКОВА,
медсестра.