12 мая 2012 г.
Телевизорпа та, радиопа та час-часах наркотик пирки каланине илтме пулать. Хаçат-журналта та сахал мар çыраççĕ. Çамрăксем ун сĕрĕмĕпе ан сиенленччĕр тесе тăрăшаççĕ ĕнтĕ. Енчен те наркотикпа минренĕ пулсан, ăна мĕнле уйăрмалла;
И. Петрова. Çын наркотикпа усă курнине кăтартакан паллă темиçе. Куçа тÿрех тăрăнаканнисем–укол йĕрĕсем, ÿт çинчи кăвакарнă, кастарнă вырăнсем, кĕсьене чиксе çÿрекен пĕтĕрнĕ хут татăкĕсемпе укçа, çунса хăрăмланнă кашăк, тимĕр савăт. Паллăсен тепĕр ушкăнне ÿте кăвак е хĕрлĕрех тĕс çапни, куç шăрçи сарăлни е пĕрĕнни, хĕрелни, чĕлхе çыхланни е виçесĕр нумай калаçни, аппетит çухални е питĕ нумай çини, вĕçĕмсĕр ÿсĕрни, тайкаланса утни е сăлтавсăр такăнса ÿкни, юн пусăмĕ ÿсни, вар-хырăм ĕçĕ пăсăлни кĕреççĕ.
Çавăн пекех çынна сăнанă хыççăн та вăл наркотикпе усă курнине уйăрса илме пулать. Çакăн палли питĕ нумай. Хăшне-пĕрне кăна асăнăпăр. Тĕслĕхрен, сăлтавсăр тулхăрни, ĕçлес килменни, обществăран уйрăлни, пĕччен пулма тăрăшни, çынсенчен пăрăнни, малтан кăсăклантарнă ĕçсенчен тарни, ас-тăвăм вăйĕ тата тимлĕх чакни, килтен час-часах сăлтавсăр тухса кайни, шкулта, институтра начар вĕренме пуçлани, кăмăл-туйăм хăвăрт улшăнни, ывăнни, килтен хаклă япаласем, кĕнекесем, тумтир, аудиотехника çухални, телефонпа калаçнă чух ятарлă сăмахсемпе усă курни.
Çывăх çыннăра сăнăр. Иккĕленÿ çирĕпленчĕ-тĕк, çухалса ан кайăр. Тăхтаса тăмасăр наркологи диспансерне васкăр, наркологран пулăшу ыйтăр.
Н. НАДИНА,
врач-нарколог.