Публикации » Тахçантанпа кĕтнĕ çумăр шултра пăр илсе килчĕ

26 мая 2012 г.

АКА-СУХА ĕçĕсем вĕçленсе пынă май, ял çынни типсе кайма ĕлкĕрнĕ çĕр-аннемĕре апатлантарма тахçанах ăшă та тÿлек çумăра кĕтетчĕ. Микула хыççăн тепĕр кунне районти хăш-пĕр ялсене ĕмĕтленни çитрĕ. Аслă Пÿлĕхçĕ мĕн ыйтнине антарса пачĕ темелле. Анчах кăмăла ти-вĕçтерекеннине мар, икĕ пĕççе шарт! çапса тĕлĕнмеллине. Кăнтăр апачĕ иртнĕ хыççăн 14-15 сехетсенче Юхмапа Пăла тăрăхне хупăрласа илнĕ хура пĕлĕтсем уйрăмах Именкассипе Кĕçĕн Арапуç, Хирти Пикшик ялĕсенче пурăнакансене шар кăтартнă. Салма пысăккăш пăр катăкĕсем туххăмрах анкартисемпе пĕчĕк пахчасене хĕллехи евĕр шап-шурă туса хунă, чылай çынсем акнă-лартнă çимĕçĕсене хуçса-йăвантарса пĕтернĕ. Шăхаль выççелккин масарĕ çумĕнчи хăш-пĕр яштак хурăнсем те çут çанталăк пулăмĕн мăшкăлĕ пулнă.