Публикации » Вăрăм алăллă пушар сăлтавĕ хамăрта

30 мая 2012 г.

ÇАНТАЛĂК çу кунĕсене куçса пынăçемĕн, кил-тĕрĕшре пушар тухас хăрушлăх та ÿсет. Май уйăхĕнче çеç районта ятарлă надзор сотрудникĕсем тăватă хутчен чуна çÿçентерекен сас паракан хĕрлĕ машинăсемпе васкавлăн вырăнсене тухса кайнă. Пĕлтĕр вара самай сахалрахчĕ. Апла-тăк сехĕрленме сăлтавĕ пысăк. Вут-çулăмпа куçа-куçăн кĕрешекенсем çирĕплетнĕ тăрăх, чылай чухне инкек сăлтавĕ – кил-хуçисен асăрханманнинче. Акă Шăнкăртамри Ленин урамĕнчи 77-мĕш çуртран амаланса тухнă пушар та пурăнакансенчен килнĕ. Ытла ирĕклĕ пурнăçа кăмăллакан авланман икĕ пĕртăван хăйсен тирпейсĕрлĕхĕ пирки ятарлă службăсенчен темиçе хутчен те ÿпкев кăна мар, штраф та илнĕ. Анчах çамка çине картман. “Çимĕçĕ” те ав куç кĕрет. Пĕр каçхине вĕсен çурчĕ вăрăм алăллă пушарта чутах шĕл кăвара çаврăнман. Сăлтавĕ – чикарккă тĕпне тĕплĕн сÿнтерменни.