30 мая 2012 г.
КĂЧУХНЕ çынсем компьютер мелĕсемпе усă курса хăйсен тавра курăмне чылай анлăлатаççĕ. Ăслă техникăн вăрттăнлăхне алла илнисем кирлĕ чухне хăйсемех тухтăра та, инженера та, повара тата ыттине те пултараççĕ. Ан ÿркен çеç! Пĕчĕк арча çăмăллăхĕпех студентсем ниçта тухмасăр реферат, диплом, наука ĕçĕсем çыраççĕ, тĕрлĕрен авторсен пултарулăхĕпе паллашаççĕ... Çапах паян вулавăша килсе ăша пусаракансем те йышлă. Иртнĕ эрнере библиотекарьсем хăйсен професси уявне паллă тунă май, Юхмапа Пăла тăрăхĕнче “чун апачĕшĕн” çулталăк тăршшĕпех хыпса çунакансене палăртнă. Районта вĕсем сахалăн мар, пурне те ятран асăнса пĕтереймĕн. Шăхачри А.Беляева пирки вара уйрăммăн палăртмалла. Анна Андреевна вуннăмĕш теçеткене куçнă пулин те алă туни хулăнăш кĕнекесене пĕрин хыççăн тепĕрне шĕкĕлчет. Кирлĕ пулсан, содержанине те каласа парать. Вăрманхĕрри Шăхалĕнче виçĕ çул каялла çеç кун çути курнă Фаина Софронова та кĕнеке тусĕ пулас шанăç пысăк. Пĕчĕк Нарспи халех алфавитри мĕнпур саспаллисене пĕлет. Çавăнпах ĕнтĕ вăл ял библиотекинчи пысăк ÿкерчĕклĕ юмахсене хăй чĕлхипе йăлтах ăнлантарать. Вăт маттур!