30 мая 2012 г.
Тăван шкулпа сыв пуллашасси Алмаз Чабатовăн нумаях юлмарĕ. Кăçал алла аттестат илет вăл. Пурнăç çулĕ çине тухма хатĕрленнĕ çамрăк вĕренĕве пĕр тикĕс тытса пыма пĕлет, умри тĕллевĕсене яланах пурнăçлама тăрăшать. Çакă ăна çитĕнÿ тума пулăшать те. Шкул ачи тĕрлĕ предметпа сахал мар çĕннине шыраса тупма пултарать. Ăна физика, математика, хими çăмăллăн парăнаççĕ. Химипе, акăлчан чĕлхипе те район шайĕнчи çитĕнĕвĕсем пур.
Каччă Патăрьелĕнчи пĕрремĕш вăтам шкулти çарпа патриот клубĕн членĕ те. Çамрăк армеецсен “Орленок” команди йышĕнче пулса пĕр хутчен çеç мар районта çĕнтерÿçĕ пулчĕ. Алмаз шывра ишме, тутарла-пушкăртла, ирĕклĕ, наци мелĕпе кĕрешме юратать. Вăл республикăри, регионсем хушшинчи, Пĕтĕм Раççейри финалти ăмăртусемпе турнирсенче пĕр хутчен çеç мар çĕнтерÿçĕ ятне тивĕçрĕ.
Вĕренекен шкулти аслă классен канашĕн членĕ пулнă май кашни шайри мероприятинех хастар хутшăнать.
И.Терентьева.