02 июня 2012 г.
Çулпа çамрăк çынсем мар ĕнтĕ эпир, саккăрмĕш теçеткере пыратпăр. Çапах та чунтан юратнă район хаçатне пĕрре те çырăнмасăр юлман. Вăл пирĕн çемьешĕн яланах кĕтнĕ хăна. Мăшăрăмпа иксĕмĕр те ăна юратса вулатпăр. Унта пичетленекен кашни материалпа тĕплĕн паллашатпăр. Мана ытларах хамăр евĕр аслă çулсенчи çынсен пурнăçĕ, кун-çулĕ пирки çырнă материалсем кăмăла каяççĕ. Хамăрăн хĕрĕмĕр, Ирина Ягупован спортри çитĕнĕвĕ пирки çырнă статьясене вулама та кăмăллă. Сăмах май каласан, вăл маунтинбайк енĕпе тĕнче шайне тухни пире те пурăнма хавхалантарать. Çула кура мар эпĕ те вăл парнеленĕ велосипедпа ярăнатăп.
Хальхи çырăнтару кампанийĕнче те чăн малтанах хамăрăн юратнă хаçатăмăрпа республикăра тухса тăракан “Хыпара” çырăнтăмăр.
Е.ЯГУПОВА,
ĕç ветеранĕ, Нăрваш Шăхаль ялĕ.