06 июня 2012 г.
Çĕртме уйăхĕнче Чăваш Енри нумай районта Акатуй иртет. Сĕм авалтан пыракан ку уява чăвашсем çурхи ĕçсене вĕçленĕ хыççăн йĕркелеççĕ, унта хастар хутшăннисене чыслаççĕ, пĕтĕмлетÿсем тăваççĕ.
Çитес шăмат кун уяв – Улатăрпа Канаш районĕсенче, вырсарни кун – Елчĕкпе Комсомольски, Элĕкпе Вăрнар, Красноармейскипе Хĕрлĕ Чутай, Муркашпа Пăрачкав, Вăрмарпа Шăмăршă, Етĕрнепе Тăвай районĕсенче.
Çĕртме уйăхĕн 24-мĕшĕнче – Республика кунĕнче – “Шупашкар: 500 çул” культурăпа кану паркĕнче пĕтĕм чăваш Акатуйне пухăнасси пирки те палăртса хăварар. Вăл Чăваш наци конгрессĕн пуçарăвĕпе, Шупашкар хула администрацийĕ пулăшнипе тăваттăмĕш хут иртĕ. ЧНК президенчĕ Геннадий Архипов палăртнă тăрăх – уява республика тулашĕнчи нумай регионтан – 400 çынран кая мар – килсе çитĕç. Çавăн пекех кăçал кашни районтан пĕрер пултарулăх коллективĕ хутшăнĕ. Вĕсем хăйсен тăрăхĕн пурнăçĕпе, ĕçĕ-хĕлĕпе, хăйне евĕрлĕхĕпе паллаштарма пултарĕç.