30 июня 2012 г.
Ял халăхĕшĕн сĕт укçа çăл куçĕ шутланать. Юлашки çулсенче çынсем ĕне-выльăх паракан продукцие сутсах алă-ура çавăрса пыраççĕ. Ахальтен мар ĕнтĕ паллакан пĕр хĕрарăм кашнинчех: “Ирпе каçпа эпĕ сĕт мар, укçа сăватăп», – тет. Ытларах кĕмĕл кĕртес текенсем 3 – 4 тата ытларах та ĕне усраççĕ. Шел пулин те, çулла сиплĕ шĕвекĕн хакĕ (хĕллехипе танлаштарсан) аванах йÿнелет. Çанталăк сивĕ чухне ăна предпринимательсем 11 тенкĕ те 50 пусран пуçласа 13 тенкĕпе туяннă пулсан, халь пĕчĕкрех. Пĕр литрĕ лимонадран та йÿнĕрех-çке! Паяна сĕте чи пысăк хакпа Тăрăн, Патăрьел, Туçа, Сăкăт ял тăрăхĕсенче – 8 т. – 8 т. 50 пуспа, Алманчă, Ыхра Çырми, Çĕнĕ Ахпÿрт, Шăхач, Çĕньял таврашĕсенче – 8 тенкĕпе, Пăлапуç Пашьелĕнче, Аслă Чементе –7 т. 50 пус – 8 тенкĕпе, Ишлĕ, Пикшик, Турхан ял тăрăхĕсенче 7 т. 50 пуспа туянаççĕ. Шăнкăртамра, Тутар Сăкăтĕнче, Первомайскинче, Кзыл Чишмара – 7 тенкĕпе, Нăрваш Шăхалĕнче 7 т. 30 пуспа илеççĕ.
(Хамăр корр.).