11 июля 2012 г.
ТАСА та ырă туйăмсене чылай чухне çăл куç шывĕпе танлаштараççĕ. Çакă ахальтен мар ĕнтĕ. Унта сурни çав тери пысăк çылăх, çапла тусан вăл типсе ларать, тенĕ. Çĕр айĕнчен шавласа килекен шыв таппин куçне вара нихăçан та хупланма памалла мар, ăна пăхсах тăмалла. Ишекри çветтуй Пантелеймон ячĕпе хисепленекен çăл куçа сăваплани тахçанах мар-ха, виçĕ-тăватă çул çеç. Апла пулин те унăн сиплĕхĕпе çак ялсем çеç мар, таврарисем те усă кураççĕ. Кунти хăтлăха, тирпейлĕхе пăхса, сăнаса тăни кăмăллă. Акă, Чăваш Ишекĕнчи культура çурчĕн ĕçченĕсемпе пуçламăш шкул-ача сачĕн коллективĕсем çакăнти тавралăха тĕпрен тирпейленĕ. Паллă ĕнтĕ, ун пек чухне уйрăм хастарсемсĕр пулмасть. Ял тăрăх депутачĕ Владимир Цыпленкин, Виталий Саламатов, Валентина Огурцова, Василий Кулаков ертсе пынипе тата тăрăшнипе паян çак вырăн тата капăрланнă.