25 июля 2012 г.
Çырла вăхăчĕ вĕçленмерĕ пулин те, тутлă çимĕçе вăрмана кайса пуçтаракансен те, пасарта туянакансен шучĕ те сахал мар. Сĕтеклĕ çырласене юратман çын çук та пулас. Çĕр çырли, хурăн çырли, хура çырла, хăмла çырли...Каласа та пĕтереймĕн. Çÿлерех асăннă çырласем витаминран пуяннине тĕпчесе палăртнă ăсчахсем. Унсăр пуçне тĕрлĕ чир–чĕртен те сывалма пулăшаççĕ. Хăшĕ ăна пĕр-пĕр хĕллехи сивĕ кун чейпе ĕçме варени туса е тутлă пылак шыв туса хатĕрлет. Çырласене сивĕтмĕше хуракансем те пур.
Вăрмана каяйманнисен пĕр витрешĕн миçе тенкĕ кăларса хумалла-ши; Пасарта сутакансен кашнийĕн хăйĕн хакĕ. Хура çырла кăмăллакансем 3 литршĕн 900 тенкĕ тÿлеççĕ,1000 тенкĕ ыйтаканнисем те пур. Четвĕртлĕ хăмла çырли витришĕн 400 тенкĕ кăларса хумалла, 5 литрлă витре вара 800 тенкĕ. Килте ÿсекен хурлăхан çырлине илес пулсан, 5 литрĕ 800-900 тенкĕ. Сезон вĕçленсе пырать, пылак çырласене туянма васкар-и;
И. КОШКИНА.