08 сентября 2012 г.
Раççей эксперчĕсем тăватă томлă “Чăваш энциклопедине” “Çулталăк кĕнеки – 2012” наци конкурсне хутшăнма сĕннĕ. Пысăк çак ĕç “Humanitas” номинацире “вăй виçĕ”. Асăннă номинацире политика, истори, философи, искусствоведени, театр, вĕренÿ ĕçĕпе çырнă кĕнекесене, словарьсене, энциклопедисене хаклĕç.
Çак кунсенче Чăваш кĕнеке издательствин директорĕ Валерий Комиссаров ячĕпе Федерацин пичет тата массăллă коммуникацисен агентствинчен телеграмма килнĕ. Чăваш кĕнеке издательствин тата Чăваш гуманитари наукисен патшалăх институчĕн ĕçченĕсене “Кĕнеке çулталăкĕ” Наци конкурсĕн çĕнтерÿçисен чыславне йыхравлаççĕ. Пĕтĕм тĕнчери XXV ярмăркка-курав 5-мĕш сентябрьте Мускавра уçăлнă. Конкурс “Çулталăк прози”, “Çулталăк поэзийĕ”, “Ахальтен мар Раççей халĕ те асра тытать”, “Эпир кĕнекепе пĕрле ÿсетпĕр”, “XXI ĕмĕрĕн вĕренÿ кĕнеки”, “Лили чечекĕ”, “Art-кĕнеке”, “Раççей пичетлесе кăларнă”, “Электрон кĕнеке” номинацисемпе иртет.