08 сентября 2012 г.
Çемьере пысăк савăнăç вăл – çуртра ача сасси пурри. Ахальтен мар ĕнтĕ мĕн ĕлĕкех “Ачаллă пÿрт пасар, ачасăр пÿрт – масар”, тенĕ. Райадминистрацин ЗАГС пайĕнчен пĕлтернĕ тăрăх, август уйăхĕнче 38 пепке кун çути курнă: 16 арçын ача, 22 хĕр ача. Кăтарту пĕлтĕрхинчен кăшт пĕчĕкрех. Иртнĕ уйăхра 35 мăшăршăн Мендельсон маршĕ янăранă. Пĕлтĕр вара пĕр çулпа 27-ĕн çеç утма тĕв тунă. Шел пулин те, 12 çемье саланнă.
Пĕрисем çут тĕнчене килеççĕ пулсан, теприсем ĕмĕрлĕх уйрăлса каяççĕ: ĕçлекенсен 55 хутчен (пĕлтĕрхинчен тăваттă каярах) çын вилнине çирĕплетекен документа çырма тивнĕ. Этемлĕхĕн вăйлă çуррийĕ вăтамран 59 çул çеç пурăнать. Хĕрарăмсем хĕвел çутипе 74 çултан кая мар киленеççĕ.
Пĕр уйăх хушшинче тăватă арçын хăйсем ашшĕ пулнине çирĕплетнĕ, пĕр çын ятне улăштарнă.