13 октября 2012 г.
Вăрман кирек хăш çанталăкра та илемлĕ. Çакна Патăрьелĕнчи пĕрремĕш вăтам шкулти кĕçĕн классем те курса ĕненчĕç. Вĕсем Шăмăршă районĕнчи “Чăваш вăрманĕ” наци паркĕнче пулчĕç, экологи сукмакĕпе утса унăн пуянлăхĕпе паллашрĕç.
Экскурсовод вĕренекенсене вăрманта ÿсекен йывăç-курăкпа, юхан-шывпа, ÿсен тăрансене усă кÿрекен хурт-кăпшанкăпа паллаштарчĕ. Хăнтăр çÿренĕ çулпа, çакăнса тăракан каçмапа каçни те асра юлĕ. Тупмалли юмахсем те пачĕç пĕрне-пĕри. Уçă та таса сывлăша кăкăр тулли сывлани, кĕрхи вăрман пуянлăхĕпе, тавралăх илемĕпе киленни, кăмпа шăрши татах та килсе курма чĕннĕнех туйăнчĕç кунта.
В. ФЕДОРОВА.