27 октября 2012 г.
ЫРĂ çын яланах ырă ĕç тума ăнтăлать. Россельхозбанкра хурал службинче нумай çулсем кăтартуллă тăрăшакан Анатолий Быков нихăçан та хăйĕн тĕп ĕçĕпе çеç лăпланса ларма хăнăхман. Çут çанталăк тусĕ яланах мĕн те пулин çĕннине, усăллине тума тăрăшать. Тăван Треньел ялĕнчи кÿлле сыхласа, упраса хăварасси, ăна пăхса тăрасси яланах унăн тĕллевĕ пулнă. Çитес çуркунне çак хастар унта тĕрлĕрен пулăсем ĕрчересшĕн. Ан тив, çынсем сĕрекепе мар, шыв айĕнче вылякан йăмпăлккасене вăлтапа тытса киленччĕр. Хальлĕхе Анатолий Алексеевичăн шухăшне çитмĕл ытла çын хапăл тунă, ĕçе пуçарса яма укçа пуçтарса панă. Ара, пĕр кĕмĕлсĕрех, расхутсăрах пысăк ĕçе пикенеймĕн. Пулă тытма тата ăна çиме юратакансем хăюллăнах çак хастарпа çыхăну тытма пултараççĕ.