25 мая 2013 г.
Çăва тухнă хыççăн районта пĕрремĕш информаци кунĕ Микула кунĕнче, майăн 22-мĕшĕнче, иртрĕ. Çавăнпа та кун йĕркинчи ыйтусем ытларах ăшă та шăрăх вăхăтра çирĕп пурнăçламалли ĕçсемпе çыхăннă: ачасен çуллахи канăвне йĕркелесси, каникул вăхăтĕнче вĕсене ĕçпе тивĕçтересси; çуллахи тапхăрта пушар тата шыв хăрушсăрлăхĕ; патшалăх çуртĕнче пурăнакансен коммуналлă çăмăллăхĕсен çĕнĕ нормативĕсем.
Хальхинче пирĕн района Чăваш Республикинчи Патшалăхăн тĕп инженер-инспекторĕ Владимир Дмитриев ертсе пыракан информаци ушкăнĕ килнĕ. Район администарцийĕн пуçлăхĕпе тата районти информаци ушкăнĕсемпе тĕл пулса кун йĕркинчи ыйтусене çивĕчлетнĕ.
Малалла информаци ушкăнĕсем хăш-пĕр ял тăрăхĕсене çитсе халăхпа тĕл пулнă, çынсене кăсăклантаракан, пăшăрхантаркан шухăшсене уçăмлатнă. Район администрацийĕн пуçлăхĕ Н. Глухов, Федераллă налук службин Управлени ертỹçин çумĕ С. Аристова, Федераци Канашĕн членĕн пулăшуçи М. Федотов Нăрваш Шăхаль ял тăрăхĕнче, "Труд" хуçалăхра, вăтам шкулта, врач офисĕнче пулса ĕç-хĕлпе паллашнă. Район администрацийĕн пуçлăхĕн çумĕ М. Калмыков тата район администрацийĕн пуçлăхĕн çумĕ - вĕрентỹ, социаллă аталану, информаци тивĕçтерĕвĕпе архив ĕçĕсен пайĕн пуçлăхĕ В. Осипов ертсе пыракан ушкăнсем Патăрьелĕнчи професси училищин производство базипе паллашнă, Ыхра Çырминчи вăтам шкулти ĕç коллективĕпе курнăçса калаçнă.
( Хамăр корр.).
Источник: "Авангард" (газета Батыревского района)