19 декабря 2012 г.
Ноябрĕн 1-мĕшĕнче сунар сезонĕ уçăлнă. Вăл 2013 çулхи февралĕн 28-мĕшĕччен пырать. Çак тапхăрта мулкач, тилĕ, пакша, енот, сăсар (лицензипе) тата пăсара тытма юрать. Мулкачсене вара – декабрĕн 31-мĕшĕччен кăна.
Сунар йыттисене çулсеренех общество председателĕ патĕнче шута тăратмалла. Вĕсем валли паспорт илмелле. Унсăр пуçне ветеринар патĕнче прививка тунине çирĕплетекен пичет те пулмалла.
Путевкăсем илнĕ чухне общество членĕсем çăмăллăхсемпе усă курма пултараççĕ. Çавăнпа та взнос укçине вăхăтра тÿлемелле. Сунар хуçалăхĕнче тÿлевсĕр ĕçленине палăртни кирлĕ. Çавна шута илсе путевка хакĕ 250 тенкĕ е тÿлевсĕрех пулĕ. Тÿлевсĕр ĕçленине хак хума ятарлă таблица пулăшĕ. Сăмахран, пĕр кашкăр тытни 15 кун ĕçленипе танлашать. Унсăр пуçне сунарçă тÿлевсĕр путевкăна тивĕçет. Ăна илнĕ чухне паспорт, полици килĕшĕвĕ, Раççей тата общество членĕ пулнине çирĕплетекен билетсем кирлĕ.
Сунар сезонĕ пĕтсен путевскăсемпе лицензисене вунă кунра тавăрса памалла.