18 сентября 2013 г.
Чăвашстат кăтартăвĕсем тăрăх _ Чăваш Енре уйăхри вăтам ĕç укçи 2013 çулхи кăрлач-утă уйăхĕсенче 18623,4 тенкĕпе танлашнă. Ку кăтартупа республика федерацин Атăлçи округĕнче (ФАО) 10-мĕш вырăнта, çак енĕпе вăл Мордовирен (16954 тенкĕ), Мари Элтан, Киров тата Ульяновск облаçĕсенчен иртнĕ. Çак тапхăрта ФАОра уйăхри ĕç укçи Тутарстанранра чи пысăкки пулнă: 24809,8 тенкĕ.
Чăваш Енре асăннă тапхăрта шутласа панă ĕç укçи 106,9 процентпа танлашнă (2012 çулхи çав тапхăр тĕлĕшпе). Ку вăл ФАО регионĕсен хушшинче тăваттăмĕш кăтарту. Чи пысăк кăтарту Мордовире _ 113,1 процент, чи пĕчĕкки _ Пермь крайĕнче (103,9 процент).
Çуралнисен йышĕпе республика ФАОра 7-мĕш вырăн йышăнать: 10000 çын пуçне _ 139. Çут тĕнчене килнисен шучĕпе Тутарстан малта: 10000 çын пуçне _ 147, чи пĕчĕкки _ Мордовире (10000 çын пуçне _ 99).
Халăх йышĕ ỹснин кăтартăвĕ Чăваш Енре 1000 çын пуçне 0,4 танлашнă: ФАОра тăваттăмĕш вырăн. Ку енĕпе чи малта Удмурти _ 1000 çын пуçне 1,5. Округри çичĕ регионта халăх йышĕ чакни палăрнă, чи пысăкки _ Мордовире (1000 çын пуçне минус 5,3).
Ĕç укçи парăмĕ кăçалхи çурла уйăхĕн 1-мĕшĕ тĕлне 3,9 млн тенкĕ пулнă _ ФАОра чи лайăх кăтарту. Шалу парăмĕ ытларах Муркаш районĕнчи "Ударник" ФПУПа пырса тивет. Федерацин Атăлçи округĕнчи регионсен хушшинче ĕç укçин парăмĕ чи пысăкки Тутарстанра _ 90,379 млн тенкĕ.
Источник: "Авангард" (газета Батыревского района)