Публикации » Чарăнса пăхмасăр иртсе каяйăн

22 декабря 2012 г.

ТАВРАНА каç ыйхинчен вăратса кăвак шуçăм килсе çутатиччен е каçхине çăлтăр тухнă хыççăн та район центрĕн хăш-пĕр вырăнĕсем асамлă юмах тĕнчине аса илтереççĕ. “Хĕллехи фантази” конкурса хутшăнса капăрлатнă çуртсем умĕнчен чарăнса киленмесĕр иртсе каяймăн. Ку тĕлĕшпе “Россельхозбанк” коллективĕ çулсеренех Çĕнĕ çула хавхаланса кĕтсе илни сисĕнет. Хальлĕхе вĕсен капăр чăрăшĕсем тавра тăрса ташлакан çыннисем курăнмаççĕ, Хĕл Мучийĕ те çитеймен-ха. “Булат” магазинпа хăна çурчĕн таврашĕ те иртен-çÿрене пăхса киленме кăмăллă. Хăйсен фантазине çынсемпе пайланă коллективсем татах та пур. Хисеплĕ тÿре вĕсене пĕтĕмлетнĕ хыççăн çĕнтерÿçĕсемпе вулакансене паллаштарăпăр.