26 октября 2013 г.
РАЙОНТИ пушар надзорĕн хыпарĕнчен ку таранччен Юхмапа Пăла тăрăхĕнче вут-çулăм синкерлĕхĕпе пулнă хĕрĕх тĕслĕхе шута илни паллă. Юпа уйăхĕнче çеç пушарниксен "01" пулăшу шăнкăравĕпе виçĕ хутчен васкавлăн вырăнсене тухса кайма тивнĕ: Кивĕ Ахпỹрте, Çĕнĕ Ахпỹрте тата Упамсана. Инкекĕ пурин те пĕрешкел, сăлтавĕсем вара кашнийĕн тĕрлĕрен.
Сăмахран, Меньшиковсен хуçалăхĕ кил хуçи вут тĕртнипе кĕл купине çаврăннă. Апăрша арçынни çавăн чухнех тухса тарнă. Вăл ăçта иккенни паянхи кунччен те паллă мар-ха. Çĕнĕ Ахпỹртри Волковсем вара пĕчĕк шăпăрланĕ шăрпăкпа ашкăннăран вут мăшкăлне курман. Юрать-ха инкеке вăхăтра сиссе парăнтарнă. Сăмах май каласан, çак сăлтавпа кăçал районта виççĕмĕш хут пушар алхасрĕ. Упамсари Филипповсем те хăйсен асăрханусăрлăхне пулах чутах тĕпĕ-йĕрĕпе çунса кайман. Çакскерсем пĕр розеткăпа харăсах темиçе электроприбор çыхăнтарса усă курнă. Нагрузка пысăк пулнăран çак вырăнтан вут-çулăм сирпĕнсе хыпса илнĕ.
Источник: "Авангард" (газета Батыревского района)