10 января 2013 г.
Çĕнĕ çул умĕн Чăваш кĕнеке издательствипе Чăваш патшалăх гуманитари наукисен институчĕ сăмах ăстисене парне турĕç: икĕ томлă “Вырăсла-чăвашла” словарь пичетленсе тухрĕ.
Словарь “Раççей культури” федераци программи тата ЧР информаци политикипе массăллă коммуникаци хатĕрĕсен министерстви пулăшнипе кун-çути курнă. Унпа вăтам тата аслă шкулсенче, массăллă информаци хатĕрĕсенче, патшалăх управленийĕн тата йĕрке сыхлавĕн органĕсен ĕçĕ-хĕлĕнче, сывлăх сыхлавĕнче, суту-илÿре усă курма пулать. Ăнланма йывăр сăмахсен, ытларах терминсен, пĕлтерĕшĕсене уçса панă. Хушма пайра вырăс грамматикин хăш-пĕр йĕрки те пур. Словаре 32500 сăмах кĕртнĕ.
Авторĕ – филологи наукисен докторĕ, Чăваш республикин наукăн тава тивĕçлĕ деятелĕ, Н.И. Ашмарин ячĕллĕ преми лауреачĕ Михаил Скворцов. Михаил Иванович хăй ĕмĕрĕнче 30 ытла словарь пухса хатĕрленĕ. Вĕсен йышĕнче “Чăвашла-вырăсла словарь” те.