11 января 2014 г.
Кĕçĕн класран вăтаммине куçнă вăхăтра шкул ачине хăнăхма çăмăл мар. Вĕрентекенсен йышĕ ỹсет. Кашнийĕ предмета анлăн алла илтересшĕн. Çавна шута илсе Çĕнĕ Ахпỹрт тĕп шкулĕнчи пиллĕкмĕшсем йывăрлăхсене хыçа хăварса вĕренỹ çине тимлĕн пăхма хăнăхаççĕ. Класĕнче пурĕ 14 ача. Вĕрентекенсем вĕсемпе уроксенче çеç мар, вĕсем хыççăн та ĕçлеме ỹркенмеççĕ. Акă, физкультура учителĕ Н. Михайлов çитĕнекен ăрăва хоккей, ирĕклĕ майпа кĕрешес секцисене явăçтарать. Вырăс чĕлхипе вĕрентекен Л. Казакова драма кружокĕнче спектакльсем выляттарса хавхалантарать. Класс ертỹçи И. Павлова ачасене кĕркунне Йĕпреçри этнографи музейне илсе кайса кăтартрĕ. Хусанти аквапаркра та вĕренекенсем кăмăлтан чăмпăлтатрĕç.
Ачисене ашшĕ-амăшĕ пулăшса пымаллине те Ирина Гурьевна класри пухусенче ăнлантарсах тăрать. Çитĕннисем çамрăк ăрупа пĕрле икĕ хутчен "Хаваслă эстафета" ирттерчĕç.
Т. КАШТАНОВА, директор çумĕ
Источник: "Авангард" (газета Батыревского района)