15 февраля 2014 г.
Полицин федераллă саккунĕпе килĕшỹллĕн, тăваттăмĕш çул ĕнтĕ районти шалти ĕçсен пайĕнче регистрацилемен пăшалсене тата ытти тĕрлĕ çар хатĕрĕсене йышăнаççĕ. Граждансене çак япаласене хăйсем илсе килсе панăшăн уголовлă йĕркепе айăпласран та хăтараççĕ. Унсăр пуçне вĕсене çак ĕçшĕн райадминистраци урлă укçа-тенкĕ парса хавхалантараççĕ. Сăмахран, 2013 çулта виçĕ çынна çапла тав тунă. Çакнашкал йĕрке кăçал та пулĕ. Хĕç-пăшала кирек хăш вăхăтра та полицин дежурнăй чаçне килсе пама май пур.
Хакĕсем вара çапларах: сунар пăшалĕ (гладкоствольный) _ 1000 _ 1500 тенкĕ, пĕчĕк калибрли _ 1500 _ 3000 тенкĕ, килте хатĕрлени (обрез) 1000 _ 1500 тенкĕ, граната, мина _ 3000 _ 4500 тенкĕ.
Кунта çакна та палăртса хăвармалла. Регистрациленĕ пăшала урăх региона илсе каяс тесен граждансен пирĕн пата килсе ятарлă ирĕк илмелле. Унăн срокĕ _ пĕр уйăх. Ыйтса çырнине патшалăх çăмăллăхĕсем пирки калакан портал урлă интернетпах пурнăçлама пулать. Малтан регистрациленмелле çеç.
А. АНТИПОВ, район полицийĕн хĕç-пăшал ыйтăвĕсен инспекторĕ
Источник: "Авангард" (газета Батыревского района)