12 марта 2014 г.
МАРТĂН 10-мĕшĕнче ирхине тăхăр сехетсенче Çĕрпỹ районне кĕрекен аслă çул çинче хăрушă авари пулнă. Интернетри хыпар тăрăх çакă паллă: 56 çулхи ГАЗ _ 2705 водителĕ çулăн хирĕç килекен йĕрĕ çине тухнă та икĕ машина (тепĕр ГАЗ тата "Шевроле Клан") çине пырса кĕнĕ. Патăрьелĕнчен Шупашкара çỹрекен çăмăл кỹме салонĕнче çичĕ çын пулнă. Ашшĕ-амăшĕн чĕрçи çинче ларса пыракан икĕ çулти хĕр ачапа пĕррери арçын ача, 36 çулхи водительпе 65-ри хĕрарăм инкек пулнă вырăнтах куçĕсене ĕмĕрлĕхех хупнă, 25-ри амăшĕ те тепĕр икĕ сехетрен больницăра вилсе кайнă. Йывăр суранлă çемье пуçлăхĕ реанимаци уйрăмĕнче.
Çанталăк çуркунне енне сулăнчĕ пулин те, ирхине çав-çавах сивĕ тăрать-ха, çулсем те пăрлă. Çавăнпа та водительсен, уйрăмах саккуна пăхăнса е пăхăнмасăр пассажирсемпе ĕçлекен шоферсен çул-йĕр правилине çирĕп пăхăнмалла.
Источник: "Авангард" (газета Батыревского района)