16 апреля 2014 г.
Вырсарни кун, апрелĕн 13-мĕшĕнче, Аслă Чементе пĕр мандатлă улттăмĕш суйлав округĕпе Аслă Чемен ял тăрăх Пухăвĕн депутатне суйлас тĕлĕшпе хушма суйлав иртнĕ. Суйлава Туптов тата Центральнăй урамсенче пурăнакансем хутшăннă.
Суйлав правипе списока кĕртнĕ 74 хĕрарăмпа арçынтан 67-шĕ усă курнă. Бюллетене виçĕ хушамат кĕртнĕ: Николай Никитич Медведев _ инвалида пăхакан социаллă работник, Эльвира Васильевна Медведева _ Аслă Чемен ял администрацийĕн уборщици, Эдуард Геннадьевич Петров, Шупашкарти "Автопарк ТВ" обществăн коммерци директорĕ.
Урнăна уçса бюллетеньсене шутланă хыççăн суйлавçăсенчен ытларахăшĕ _ 53 суйлавçă _ хăйсен сассине "Единая Россия" партин кандидачĕшĕн, Эльвира Медведевашăн, пани палăрнă.
Пĕтĕмĕшле илсен суйлав ăнăçлă иртнĕ, вырăнти "халăх тарçине" суйлама суйлавçăсен 90,4 проценчĕ хутшăннă.
Хамăр корр.
Источник: "Авангард" (газета Батыревского района)