26 апреля 2014 г.
ĔНЕР республикăра Чăваш чĕлхи кунне паллă турĕç. Тăван халăхăмăра çутта кăларакан Иван Яковлевич Яковлев çуралнă кунĕпе пĕр килекен уяв йăлана кĕрсе çирĕпленчĕ темелле. Кăçалхипе ăна çирĕм иккĕмĕш хут палăртрĕç. Чăваш чĕлхи кунĕ пĕтĕм халăх уявĕ пулса тăчĕ тесен те юрать: тăван чĕлхене ача сачĕсенче, шкулсенче, институтсенче вĕрентеççĕ, чăвашла кĕнекесем, журналсем, хаçатсем пичетленеççĕ, радио тата телепередачăсем йĕркелеççĕ. Интернет сечĕсенче те чăвашла сайтсем пур.
Район администрацийĕн пуçлăхĕ Николай Глухов Юхмапа Пăла тăрăхĕнче тăван чĕлхене, хамăрăн йăла-йĕркене, культурăна сыхласа хăварас тĕлĕшпе пысăк ĕç тăвакан вĕрентекенсене, культура ĕçченĕсене, уйрăм хастарсене уяв ячĕпе ăшшăн саламланă.
Источник: "Авангард" (газета Батыревского района)