26 апреля 2014 г.
Сăкăт шкулĕнчен 5-мĕш класран вĕренсе тухнă хыççăнах П. Абдулкин Екатеринбургри çар училищине кайрĕ. Пĕр партта хушшинче ларакан юлташĕсенчен уйрăлма йывăр пулсан та вăл ашшĕ çулĕпех утас терĕ.
Петя суворовец тумне тăхăнни 5 çул çитрĕ. Вăл халь кĕрнеклĕ те чипер каччă. Яла каникул вăхăтĕнче таврăнсан тỹрех юлташĕсем, вĕрентекенсем патне, пĕлỹ çуртне васкать, пурнăçĕпе интересленет, çар училищин ĕç-хĕлĕпе паллаштарать. Юлташĕсем те пулас офицертан тĕслĕх илеççĕ, ун пек пулма тăрăшаççĕ.
_ Тăван шкула яланах чун туртать. Пĕрле ăс пухнă ачасем пирки те пĕлес килет. Çĕр-шыва юрăхлă çын пулас тесен вĕренỹ патне тимлĕх уйăрмалла. Хамăр тăрăшсан кăна çитĕнỹсем пулаççĕ, _ тет П. Абдулкин.
(Хамăр корр.)
Источник: "Авангард" (газета Батыревского района)