Публикации » Çĕнтерỹ уявĕ _ чаплă кун

08 мая 2014 г.

Çĕнтерỹ уявĕ_ Пирĕн чаплă кун,

Паттăрсен уявĕ,

Хаваслантăр чун.

Çĕнтерỹ ялавĕ

Хĕвелпе çиçет,

Ирĕклĕх уявĕ

Янăрать, кĕрлет.

Пурте шăп тăратпăр

Пилĕк минута.

Савăнăçпа хурлăх

Ма йĕртет чуна?

Эх, мĕн-ма сайралчĕç

Ватă салтаксем?

Куçăмран çухалчĕç

Çутă сăн-питсем.

Халĕ те куратпăр

Вăрçă суранне.

Халĕ те тỹсетпĕр

Вăрçă инкекне.

Халĕ те манмастпăр

Йывăр кунсене,

Шав асра тытатпăр

Паттăрсен ятне.

Палăксем лараççĕ

Ялта, хулара.

Çуртасем çунаççĕ Панихидăра.

Халăх нумай тỹсрĕ

Вăрçă нушине,

Тăрăшса ĕçлерĕ

Кунĕ-çĕрĕпе.

Пурнăçа юсарĕ

Вăрçă чарăнсан,

Çĕр-шыва çĕклерĕ

Пур йывăрлăхран.

Малашне ан пултăр

Вăрçă çĕр çинче,

Пурнăç хуçалантăр

Çутă тĕнчере.

Леонид ЛЯЛЬКИН

Источник: "Авангард" (газета Батыревского района)