17 мая 2014 г.
РАЙОНТА салтака каймалли çуркуннехи тапхăр пырать. Çавна май Патăрьелĕнчи çар пайĕ умĕнче мăйĕсенчен пит шăллисем уртса янă каччăсене час-часах курма пулать. Çĕньялсем вара харăсах виçĕ йĕкĕте сĕт çулĕпе кайса çу çулĕпе килме пил панă.
Николай Елимов, Федор Тямин, Денис Савельев кăçал Патăрьелĕнчи агротехникумран диплом илнĕ. Вĕренỹре ачасем хăйсене лайăх енчен çеç кăтартнă. Спорт мероприятийĕсенче те айккинче тăман. Çавăнпа та чăн-чăн салтак пулма ăнтăлакан çамрăксене присяга йышăннă хыççăн çар пурнăçне хăнăхма та йывăр пулмĕ. Çулталăкран вара вĕсем хул-çурăмран тĕрекленсе, ăс-хакăлтан пуянланса, сăн-питрен илемленсе таврăнĕç. Çапла пултăрах!
Источник: "Авангард" (газета Батыревского района)