21 мая 2014 г.
Майăн 19-мĕшĕнче республикăн тĕп хулинче халăхсем хушшинчи кинофестиваль уçăлчĕ. Кăçалхи кино уявĕ Чăваш Енре 7-мĕш хут иртет.
Çавна май пысăк экран çинче пахалăхлă фильмсем пăхма, паллă артистсемпе куçа-куçăн курса калаçма май пулать. Кинофестивалĕн тĕп тĕллевĕ _ сахал йышлă халăхсен кинематографĕсен ĕçĕсене халăх патне çитересси. Кăçал тĕп конкурссăр пуçне наци киностудийĕсен конкурсне уйрăм ирттерме палăртнă. Унчченхи çулсенчи пекех, фестиваль президенчĕ _ "Мосфильм" киноконцерн директорĕ, паллă кинорежиссер Карен Шахназаров.
Конкурс программине 12 фильма кĕртнĕ. Наци студийĕсен 14 картина пулĕ. Унпа пĕрлех куракансем кăмăллакан "Фестиваль фестивалей", "Кино каçĕ" ятарлă проект пулать. Арт-студисем, специалистсем тата кино юратакансем валли мастер-классем, тĕл пулусем, çавра сĕтелсем йĕркелеççĕ.
Кино курса киленес текенсем сеанссене, тĕл пулусене _ пур çĕре те тỹлевсĕр кĕреççĕ.
Çак кинофестиваль программипе килĕшỹллĕн, пирĕн районта та мероприятисем ирт-терме палăртнă. Майăн 23-мĕшĕнче, акă Патăрьелĕнчи культурăпа кану центрĕнче 13 сехетре Раççей Федерацийĕн тава тивĕçлĕ артисчĕпе Сергей Фетисовпа тĕл пулу пулать. Интереслĕ кино кăтартаççĕ.
А. ИВАНОВА
Источник: "Авангард" (газета Батыревского района)